روشن ہے تجھ سے کُو بہ کُو، اللہَ جلَّ شانہٗ
ہے نور تیرا چارسُو، اللہَ جلَّ شانہٗ
اے خالقِ کون و مکاں، قدرت کا تیری ہے نشاں
یہ کائناتِ رنگ و بُو، اللہَ جلَّ شانہٗ
روزِ ازل سے تا ابد، گونجے سدا ’اللہ صمد‘
ہر سمت ہے: ’اللہَ ھُو‘ ، اللہَ جلَّ شانہٗ
روح و دل و جاں کے مکیں، تو ہے رگِ جاں سے قریں
پھر بھی ہے تیری جستجو، اللہَ جلَّ شانہٗ
جاں سُکھ میں ہو دِل چین میں، حاضر ہوں ہم حرَمین میں
ہے یہ دعا، یہ آرزو، اللہَ جلَّ شانہٗ
تیرے کرم کی انتہا، سانسوں میں چلتی ہے ثنا
جیسے رگوں میں ہے لہو، اللہَ جلَّ شانہ
سب تجھ سے ہے، سب کچھ تِرا، پھر شکر ہو کیسے ادا
بِن مانگے سب دیتا ہے تُو، اللہَ جلَّ شانہٗ
میں نے کہا: ’’آزار ہے، دل میں خطا کا بار ہے‘‘
تو نے کہا: ’’لا تقنطو‘‘، اللہَ جلَّ شانہٗ
احباب و آلِ مصطفیٰ، عکسِ جمالِ مصطفیٰ
ہیں اولیأ آئینہ رُو، اللہَ جلَّ شانہٗ
سب سے حسیں تیری عطا، یعنی محمد مصطفٰے
میں نام لوں کر کے وضْو، اللہَ جلَّ شانہ
